ការផ្លាស់ប្ដូរឈ្មោះប្រទេសពី សៀម មក ថៃ
By ilovekhmer.org
Published: July 24, 2009
Posted in: Thai History
ប្រទេសសៀម បានប្ដូរឈ្មោះមកថៃ នៅថ្ងៃទី១១ មិថុនា ១៩៣៩ និងប្ដូរមកសៀមវិញ នៅឆ្នាំ ១៩៤៥ រហូតដល់ថ្ងៃទី ១១ ឧសភា ១៩៤៩ ទើបប្ដូរមកថៃវិញ ។
គេមិនដឹងថាពាក្យសៀមមានន័យយ៉ាងណា ឬបានមកពីណាទេ តែមានអ្នកខ្លះថាជាពាក្យសំស្ក្រឹត ដែលមានន័យថា ខ្មៅ ឬ ងងឹត ។
ការពិភាក្សារវាងក្រសួងការពារជាតិរបស់សៀម និងនាយករដ្ឋមន្ត្រីសៀម ប៉. ភិបូលសុងក្រាម ឬ ផ្លែក វិបុលសង្គ្រាម បានលើកឡើងដូចខាងក្រោម ៖
1. ឈ្មោះ “សៀម” មិនសក្ដិសមនឹងសញ្ជាតិថៃ ។
2. ឈ្មោះ “សៀម” មិនសក្ដិសមនឹងជនជាតិថៃ ។
3. សៀមជាឈ្មោះខែត្រមួយរបស់ ខម (ខ្មែរ) ដែលគ្រប់គ្រងពួកថៃ លុះព្រះរោង ទទួលបានឯករាជ្យពីខ្មែរ ឈ្មោះសៀមនេះ ត្រូវបានគេឈប់ប្រើរួចទៅហើយ ។
4. ពាក្យ “សៀម” ប្រើសម្រាប់តែការសរសេរ មិនប្រើក្នុងការនិយាយ ។
5. ជនជាតិថៃអស្ចារ្យ គួរតែដាក់ឈ្មោះមួយឲ្យសក្ដិសមទៅនឹងកិត្យានុភាពរបស់ប្រជាជាតិថៃ ។
ដោយការលើកឡើងខាងលើសក្កិសម និងមានការបំផុសបំផុលឲ្យជនជាតិថៃចេះស្រឡាញ់ជាតិខ្លួនឯងផង ។ ឈ្មោះថៃត្រូវបានគេប្រកាសឲ្យប្រើទូទាំងប្រទេស តែគណបក្សសេរីថៃមិនគាំទ្រឈ្មោះថ្មីនេះ ដោយយល់ថា ជាការកែប្រែប្រវត្តិសាស្ត្រមួយដ៏ធំធេង ។ គ្រប់សៀវភៅប្រវត្តិសាស្ត្ររបស់ប្រទេសជិតខាង ឬប្រទេសឆ្ងាយៗក្ដី សុទ្ធតែប្រើឈ្មោះ សៀម ដូច្នេះគេគួរតែប្រើឈ្មោះសៀមដដែលទើបជាការប្រសើរ ។
ឆ្នាំ ១៩៤៤ គណបក្សសេរីថៃ ទទួលបានការគាំទ្រជាង វិបុលសង្គ្រាម និងបានឡើងកាន់អំណាច ។ ខាងគណបក្សសេរីថៃ ដែលមិនគាំទ្រនឹងការកែប្រែឈ្មោះប្រទេសនេះ បានប្ដូរទៅឈ្មោះ សៀម ដូចដើមវិញ ។
រហូតដល់ឆ្នាំ ១៩៤៧ ក្រោយការឡើងកាន់អំណាចជាបន្តបន្ទាប់មកជាច្រើននាក់ វិបុលសង្គ្រាម បានឡើងកាន់អំណាចជាថ្មីម្ដងទៀត និងបានប្ដូរឈ្មោះប្រទេសពីសៀមទៅថៃវិញតាមដែលខ្លួនប្រាថ្នា ។
ក្រោយរដ្ឋប្រហារទម្លាក់នាយករដ្ឋមន្ត្រី វិបុលសង្គ្រាម គេបានគិតគូរឈ្មោះរបស់ប្រទេសជាថ្មីម្ដងទៀត ដោយធ្វើការបោះឆ្នោតរវាងឈ្មោះ “ថៃ” និង “សៀម” ។ អ្នកដែលបោះឆ្នោតឲ្យឈ្មោះថៃបាន ១៣៤សំឡេង ចំណែក “សៀម” បានតែ ៥សំឡេងប៉ុណ្ណោះ ។
នៅមានការទាមទារឲ្យដូរឈ្មោះទៅសៀមវិញម្ដងទៀតពីអ្នកចេះដឹងសៀម មួយក្រុម តែនៅពេលដែលស្ដេច រាមាទី៩ ឡើងសោយរាជ្យ ទ្រង់បានហៅខ្លួនទ្រង់ថា ព្រះមហាក្សត្រនៃព្រះរាជាណាចក្រថៃ ។ ចាប់ពីពេលនោះមក ប្រទេសសៀម បានដូរឈ្មោះមកប្រទេសថៃលុះសព្វថ្ងៃ ។
ងាកមកអត្ថន័យឈ្មោះ “សៀម” ដែលជាឈ្មោះអតីតរបស់ប្រទេសថៃក្នុងផ្នត់គំនិតរបស់ខ្មែរមួយចំនួន យល់ថា ពួកសៀម ជាមនុស្សមួយក្រុមចុះមកពីប្រទេសចិនភាគខាងត្បូង ឬចិនអាណាម (ចិន + អាណាម) មករស់នៅលើទឹកដីកម្ពុជា ។ ពួកនេះជាពួកចោរព្រៃ ដែលត្រូវពួកចិនវាយរត់រកកន្លែងជ្រកកោណគ្មាន ក៏ធ្វើដំណើរមកដល់អាណាចក្រខ្មែរ និងសុំជ្រកកោណលើទឹកដីខ្មែរ រហូតដល់ពួកនេះមានអំណាច មានឥទ្ធិពលខ្លាំង ក៏ចាប់ផ្ដើមវាយដណ្ដើមយកទឹកដីខ្មែរ និងរស់នៅរហូតដល់សព្វថ្ងៃនេះ ។
ទាក់ទងនឹងការដូរឈ្មោះ គេយល់ថា ដោយសារពួកនេះយល់ច្បាស់ ថាឈ្មោះសៀមមិនល្អ ឬពួកសៀមជាចោរព្រៃ ប្លន់ទឹកដី និងម្យ៉ាងដើម្បីកែប្រែប្រវត្តិសាស្ត្ររបស់ខ្លួនទៀតផង ។
មួយចំនួនទៀត យល់ថា ក្រោយពីសៀមមានទំនាក់ទំនងជាមួយពួកអឺរ៉ុប ពួកនេះក៏ប្ដូរឈ្មោះប្រទេសរបស់ខ្លួនឲ្យដូចនឹងប្រទេសនៅអឺរ៉ុប ដូចឃើញស្រាប់ មានប្រទេស England, Holland, Poland, Ireland ជាដើម ដែលភាគច្រើនប្រើជាមួយពាក្យ Land នៅ ខាងចុងដូច្នេះ ថៃក៏ប្រើពាក្យ Thailand តាមលំនាំអឺរ៉ុបដែរ ។
ចំពោះពាក្យ Thailand ឬថៃនេះ គេពុំដឹងអត្ថន័យ និងប្រភពរបស់ពាក្យនេះច្បាស់លាស់ទេ ប៉ុន្តែគេជឿថាពាក្យ ថៃ (ថៃយ) មកពីពាក្យ តៃ (ថៃ) ដែលក្នុងភាសាថៃមានន៏យថា “សេរី” តែមានអ្នកប្រាជ្ញថៃម្នាក់ជំទាស់ ថាពាក្យ តៃ មានន័យថា “មនុស្ស” ទើបត្រឹមត្រូវ ។ ទោះជាយ៉ាងណា គេបានយកន័យថា សេរី និងបានហៅប្រទេសខ្លួនថា “ប្រទេសដែលមានសេរីភាព” (Thailand = Land of the free) ដោយសារមោទនភាពដែលប្រទេសនេះរួចផុតពីនឹមត្រួតត្រារបស់ពួកអឺរ៉ុប ក្នុងសម័យសង្គ្រាមលោកលើកទី២ ។
បើសង្កេតមើលឈ្មោះប្រទេសទាំងឡាយនៅអាស៊ីអាគ្នេយ៍ ឃើញថាមានតែប្រទេសថៃនេះទេដែលមានឈ្មោះប្លែកពីគេ ហើយសមតែជាឈ្មោះប្រទេសដែលនៅប៉ែកខាងអឺរ៉ុបឯណោះទៅវិញ ។
សរុបមក ការដូរឈ្មោះពីសៀមមកថៃ ដោយសារមូលហេតុដូចបានរៀបរាប់ខាងលើ គឺឈ្មោះសៀម ធ្លាប់ជាឈ្មោះខែត្រមួយដែលស្ថិតនៅក្រោមអាណាព្យាបាលខ្មែរពីមុន ។ ជាតិនេះមោទនភាពចំពោះជាតិរបស់ខ្លួន ដោយយល់ថាជាតិខ្លួនខ្ពង់ខ្ពស់ជាងជាតិដទៃ ហេតុនេះឈ្មោះ សៀម មិនសក្ដិសមនឹងប្រជាជាតិរបស់ខ្លួនប្រើឡើយ ។ ចំណែកឈ្មោះក្រោយដែលគេជ្រើស គឺជាឈ្មោះយកលំនាំតាមអឺរ៉ុប ។ ប្រទេសនៅអឺរ៉ុបជឿនលឿន យកឈ្មោះតាមលំនាំពួកអឺរ៉ុបពិតជាសក្ដិសមតាមការចង់បានរបស់ពួកគេ ។
Currently have 0 comments: